CEBU, Philippines - Usa ka 29-anyos nga maguwang gipasanginlan nga miunay og lugos sa iyang 15-anyos nga igsuong babaye sa makadaghang higayon apan natuldokan kini niadtong Miyerkules sa dihang nasakpan sa ilang inahan sulod sa ilang pinuy-anan sa sitio Tapon, Barangay Baigad, lungsod sa Bantayan Island.
Ang biktima mitug-an nga wala siya makasumbong sa ilang ginikanan tungod kay gihulga kini sa iyang maguwang nga suspek. Ang suspek gisikop sa kapulisan sa Bantayan ug gikatakda nang gipasakaan og kaso kagahapong adlawa diha sa Provincial Prosecutors Office nga kasong pagpanglugos.
Ang biktima gidala usab sa pink room sa Vicente Sotto Memorial Medical Center (VSMMC) dinhi sa dakbayan sa Sugbu alang sa eksaminasyon.
Si Sr. Insp. Florencio Fajardo, hepe sa Bantayan Police Station nagkanayon nga ang inahan sa biktima midangop sa ilang buhatan aron ipadakop ang anak tungod sa gihimo niini sa iyang usa pa ka anak.
Si Fajardo midugang nga ang laing igsuon misuway unta og hangyo sa ilang inahan nga hiloton nalang ang hitabo apan ang inahan desididong ipabilanggo ang ikaduhang anak gikan sa kamaguwangan.
“Siya (eldest) maoy sige’g sabot nga dili na lang ikiha aron dili masamok unya dili man gyud kadawat ang inahan,” matud pang Fajardo.
Ang biktima mitug-an nga ikapito na ka higayon nga siya gilugos sa iyang maguwang apan wala na siya makahinumdom kun kanus-a petsaha o buwana siya unang gilugos sa iyang igsuon gawas lang niadtong Hunyo 10.
Suma pa sa mga silingan ngadto sa kapulisan nga ang suspek tigamitan og marijuana apan si Fajardo miingon nga ilaha pa kining susihon ang maong report kun tinuod ba ang gitug-an kanila.
Ang suspek gikatahong anaa na gitanggong sa Cebu Provincial Detention and Rehabilitation Center (CPDRC). (BANATNEWS)