Abogado ni Santos ug Griffiths supak sa live-link

CEBU, Philippines - Gisupak sa mga abogado sa akusadong sila si Bella Ruby Santos ug sa hinigugma niining Briton nga si Ian Charles Griffiths ang hangyo sa prosekusyon nga ipa-live link television ang pamaagi sa pagpangutana unya sa duha ka mga batang saksi batok sa mga akusado.

Si Atty. Julius Caesar Entise, usa sa mga abogado nila Santos ug Griffiths sa kasong kidnapping with homicide tungod sa pagpatay sa 6-anyos nga si Ellah Joy Pique, miingon nga buot nilang makita ang aktwal nga reaksyon sa mga bata sa cross examination.

Ang prosekusyon nga gilangkuban nila ni Piskal Petronio Elesterio, Annabelle Robles ug Jerome Abarca miduso og mosyon sa korte sa miaging adlaw nga ipaagi sa live-link ang pag-interbyu sa mga witnesses aron dili sila mahulga ug bation og kahadlok atol pagpangutana unya sa mga abogado sa mga akusado sa husay unya sa maong kaso.

Apan si Entise miklarong wala silay planong i-harass ang mga saksi ug nabalaka silang posibleng adunay manulsol sa mga bata diha sa pikas lawak nga dili nila makit-an.

Samtang ang mga defense lawyers nga silang Rameses Victorius Villagonzalo, Ronel Ubod, Lyndon Maceren, Roberto Rublico ug Julius Entise mipagawas og press release kagahapong adlawa nga ang law firm sa London (UK) nga nag-specialize sa kasong libel ug defamation anaa karun sa proseso sa pagpangita sa International Writs sa Queen's Bench Division of the High Court.

Matud pa nga tumong niini mao ang pagsilot sa mga tawong nagtumo-tumo sa ilang kliyente nga silang Santos ug Griffiths.

 “Writs will be served on key public officials through diplomatic channels. The defense team is not prepared at this stage to identify those who will receive such Writs nor the amounts of damages sought against individuals,” tipik sa press release.

“However they may include elected as well as appointed officials and the total damages sought could exceed £10 million (P68 million),” dugang bahin sa press release. (EIM) (BANATNEWS)