CEBU, Philippines - Gibulit og samad pinusilan ang patay’ng lawas ug gidakdakan pa og bato ang nawong sa 42-anyos nga lalaki nga gihulagway nga bagsik ug nanganting mopatay og tawo atol sa milabay’ng kalag-kalag sa barangay Lunas sa lungsod sa Asturias niadtong Miyerkules sa alas 9:00 sa buntag.
Ang biktima mao si Israel Quibuin Gemarino, 42, nagpuyo sa sitio Igay, barangay Santarita, Asturias ug gihulagway nga bagsik sa maong lugar ug giingong dunay daghang atraso.
Samtang ang suspek mao si Renante Cabigas Rebaka, 34, nagpuyo sa maong dapit.
Matud ni PO2 Douglas Maravillas, desk officer sa Asturias Police dihang nahinabi sa Banat News nga aduna nay dili maayong relasyon ang duruha ug giingong nanganti ang biktima nga di niya paabtan og liwas “Kalag-kalag” ang suspek apil na ang pamilya niini.
Apan ang iyang gibaharan pagkasayod sa panganti sa biktima daling mikomprontasi niini nga misangpot sa ilang panag-away ug tunga-tunga niini gikatahong mibunot og armas ang biktima hinungdan sa linayugay sa duha.
Tungod kay dako ug mas taas ang suspek sa biktima gilupig ang naulahi ug naunay sa iyang armas dihang gipusil makadaghang higayun sa dughan, tiyan ug kilid sa lawas.
Human mahagba gikatahong mipunit og magahing butang ang suspek ug gipuspusan ang nawong sa biktima hangtud nga napiyapi kini og maayo.
Ang suspek misibat dayon apan nadakpan sa hot pursuit operation sa kapulisan apan wala motahan sa armas.
Matud pa ni Maravillas ang biktima gihulagway kini nga bagsik sa maong lugar ug dunay daghang atraso ug gani nadakpan na kini ug nabilanggo tungod sa pagdaladala og armas nga walay lisensiya. (BANATNEWS)