2 batang testigo gipik-ap gihataga'g bugas

CEBU, Philippines - Misamot ang pagduda sa kapolisan nga aduna gyuy nagtinguhang masuhulan ang mga testigos nila sa kaso sa pagsignit ug pagpatay sa 6-anyos nga batang si Ellah Joy Pique.

Kini human si Sr. Supt. Patrocinio Comendador, tigpamaba sa Task Force Ellah Joy Pique mitug-an kagahapon sa mga tigbalita nga gi-pickup ang duha ka batang magsuon ug witness sa kaso niadtong Sabado ug gidala sa bukirang barangay sa lungsod sa Minglanilla.

Matud ni Comendador wala pasipad-i ang mga bata apan giingong gihatagan sila og tag-lima ka kilong bugas ug tag P100 matag usa sa duha ka tawong midala kanila sa bukid ug pagkahuman gipapauli ra ang duha.

Si Comendador mitataw nga sa pagkakarun dili pa siya makatumbok kun sinugo ba ni Bella Ruby Santos ang maong mga tawo aron pick-upon ang ilang mga saksi.

“Dili pa ta ka speculate kun grupo ba ni Bella ang mi-pick sa mga bata,” sumala pa ni Comendador apan nagtuo siyang adunay grupong nagtinguhang ‘kamangon’ ang ilang mga saksi.

Gipasalig hinuon niyang gibantayan gyud ang maong mga bata sa iyang mga sakop.

Duha sa sobra napulo ka mga saksi, matud ni Comendador anaa na sa witness protection program samtang ang uban ilaha pang gipaninguha nga mapaubos gihapon niini. (BANATNEWS)