16-oras nga hostage drama

CEBU, Philippines - Milungtad og 16 ka oras una pa mitahan sa kapulisan ang usa ka gwardya nga miunay og hostage sa iyang 15-anyos nga anak babaye sa ikaduhang andana sa balay nga gipanag-iya sa ugangan niini diha sa sitio Kinamagan sa barangay Poblacion sa lungsod sa Borbon.

Kini gumikan sa iyang pangabubho sa iyang asawa nga ‘misukod’ asa kutob ang iyang gugma ngadto kanila pinaagi sa wala pagtagad sa suspek.

Nagsugod ang hostage drama pasado alas-4 sa hapon niadtong Miyerkules ug kagahapon sa alas-7 na sa buntag nahuman dihang mitahan sa iyang kaugalingon ang 38-anyos nga amahan sa biktima.

Ang suspek usa ka gwardya sa GDS Security and Detective Agency nga nadestino sa usa ka dakong tindahan sa Jagobiao sa dakbayan sa Mandaue nga iyang gibiyaan sukad pa niadtong Lunes.

Ang 15-anyos nga anak nga gi-hostage nga nahinabi sa Banat News nagkanayon diha sila sa balay sa ilang apohan dihang naabot ang suspek nga hubog ug nagdala og armas ug straw twine.

Ang iyang mga igsuon ug apohan daling nakadagan gawas sa balay ug maoy nanawag sa ilang inahan kabahin sa pag-abot sa suspek ug sa gihimo niini sa 15-anyos.

Matud pa sa 15-anyos gibaatan siya sa iyang amahan sa wala niyang bukton ug ang pikas tumoy gibaat ngadto sa tuong bukton sa amahan dayon misaka sila sa ikaduhang andana sa balay.

Sumala pa nga nagpabuto usab sa .38 nga kalibre sa armas ang iyang amahan samtang didto na sila sa taas sa balay.

Ang 37-anyos nga inahan sa biktima ug asawa sa suspek nga nahinabi sa Banat News mitug-an nga siya nay mipahibalo sa mga polis kabahin sa gibuhat sa iyang bana.

Si Chief Insp. Emiliano Igot, hepe sa Borbon Police Station mipadala dayon og polis sa maong dapit aron makig-negosasyon inabagan sa gipadalang Special Reaction Unit ni Sr. Supt. Patrocinio Comendador, hepe sa kapulisan sa probinsya sa Sugbu.

Nagbinuntagay sa pagbantay ang mga polis palibot sa balay sa pagsigurong walay dautang mahitabo sa bata.

Gisugdan ang negosasyon nila ni Konsehal Roy Melgo ug si Igot nakig-negosasyon sa suspek. Matud pa diha na nalumoy ang suspek pagkasayod nga naabot ang iyang asawa ug nabalaka sa ilang kahimtang.Gani gihatagan pa og cellphone ang suspek aron makighinabi sa asawa kay gusto niining magkauliay sila sa ilang relasyon.

Sumala pa nga dul-an sa usa ka tuig na ang duha nga nagbuwag ug ang suspek dihang gikahinabi miangkong nadala gyud siya sa emosyon ug sagol ang problema maong iyang gibiyaan ang iyang pwesto ug mipauli siya sa Borbon.

Gihimakak hinuon niining plano niyang patyon ang anak kay pinalangga niya kini apan plano gyud niya untang magpusil sa iyang kaugalingon.

“Didto ra mi naglambing-lambing sa taas, kay suod man ni nako bataa gud, wala koy tuyo nga damayon nako siya (anak) ako ra gibaatan iyang bukton ug ang tumoy gibaat pud nako sa akong tuong bukton, nakahukom nalang ta ko nga magpusil kay wa nay lami kay nag-ugom ko og kaguol,” matud sa suspek sa Banat News.

Ang asawa sa suspek mitug-an nga nasuko ang iyang bana ug nangabubho tungod sa mga tabitabi sa mga silingang aduna siya’y laing karelasyon, butang nga gihimakak sa ginang.

Bisan paman nga nagpinasayloay ug nagkauyong magbalikay ang duha pasakaan gihapon og kaso ang suspek nga child abuse ug illegal possession of firearms, illegal detention ug Republic Act 9262(Anti-Violence Against Women and Children Act of 2004.(EIM) (BANATNEWS)