Nangalag-kalag gipatay sa kontra

CEBU, Philippines - Usa ka taga Davao kinsa nangalag-kalag dinhi sa Sugbo wala makauling buhi sa ilang lugar human kini dunggaba patay sa usa ka mangunguling   didto sa Sitio Dao barangay Tubod sa siyudad sa Toledo niadtong Martes sa hapon adlaw sa Kalag-kalag.

Ang biktima mao si Alexander Pardilla Son, 25, ulitawo, lumad nga taga siyudad sa Davao apan miadto sa Toledo kay nangalag kalag.

Samtang ang gitumbok nga suspek mao si Joel Diaz, 43, minyo, nagpuyo sa maong lugar ug pagpanguling ang trabaho.

Si SPO3 Carmilito, Hornales, desk officer sa Toledo City Police dihang nahinabi sa Banat News mitug-an nga nagkirig-kirig pang miabot sa tambalanan ang biktima una kini mabugtoi sa kinabuhi.

Matud pa niya nga niadto pang miaging semana nahiabot gikan sa Davao ang biktima ug nagkaaway dayon kini ug ang suspek.

Apan niadtong Martes   sa hapon subling nagkaabot ang biktima ug ang suspek sa usa ka   tindahan   sa Dao   diin nagkalalis na usab sila nga misangpot sa sinumbagay.

Apan dihang gilupig ang suspek milanit kini sa iyang ice pick ug gihansak   sa buko-buko sa biktima ug giusban pa sa hawak.

Dihang  nahagba ang biktima sa yuta ug mikirig, gibiyaan kini sa suspek dayong pahilayo sa maong lugar.

Gitabang usab sa mga silingan ang biktima ug didto na kini makabsi sa gininhawa sulod sa Toledo District Hospital. Padayon pang gipangita sa kapolisan ang suspek.  - BANAT NEWS