P100 T gikawat sa kalag-kalag

CEBU, Philippines - Mikapin sa P100 mil ang kantidad sa mga alahas, butang ug kwarta nga nadala sa wala hiilhing kawatan kinsa milungkab sa usa ka balay sa Ward IV, barangay Poblacion, lungsod sa Minglanilla sa miaging gabii atol sa Kalag-kalag.

Ang biktima mao si Luisa Guarisma, 44, residente sa maong dapit kinsa nawagtangan sa iyang assorted gold jewelries nga nagkantidad tanan og P60 mil, Nikon digital camera, P40 mil; ug kwarta nga P8 mil.

Si SPO1 Renato Masangkay uban nila ni PO1 George Campomanes ug PO1 Nikki Carlo Plarisan kinsa maoy miresponde sa   maong alarma mibutyag   sa Banat News nga   may upat ka sakop sa pamilyang Guarisma niadtong higayona   nga   nahinanok   pag-ayo sa pagkatulog hinungdan nga wala makabantay sa kawatang nakasulod sa ilang balay.

Ang mga alahas, kuwarta ug uban pang mga butang nga gikawat didto sa usa sa duha ka lawak sa balay sa biktima nga walay tawo niadtong higayona kay ang iyang mga sakop nagdug man sa pikas kwarto.

Ang kawatan giingong misaka sa koral sa balay dayon mitang-tang sa mga blade sa jalousie nga bintana sa may pansayan hinungdan nga nakasulod kini sa balay ug misaka sa ikaduhang andana niini ug mipuntariya   sa lawak nga nahimutangan sa mga butang gikawat.

Ang kapolisan   padayon pang mihimo og imbestigasyon sa maong insidente.  - BANAT NEWS