CEBU, Philippines - Sa katapusan milampos ra sa ika-limang higayon sa paghikog ang usa ka giilang drug addict kinsa namatay pinaagi sa pisi nga gihigot sa iyang liog sulod sa ilang balay sa sitio Sambagan, barangay Tanke, dakbayan sa Talisay sa miaging Martes sa alas 7:30 sa gabii.
Ang naghikog mao si Cresenciano Cabanes Jr, residente sa maong dapit, usa ka drayber sa traysikol nga nailhan sa ilang lugar nga tiggamitan og gidiling drugas.
Sa imbestigasyon sa kapolisan nasayran nga si Cabanes lima ka higayon na kining misuway sa paghikog ug niadtong Martes sa gabii milampos na kini.
Sa wala pa kini maghikog, si Cabanes giingong nangaway ug nangulata pa sa iyang asawa.
Mga alas 4:30 sa hapon niadtong Martes gidala sa asawa ni Cabanes ang ilang mga anak ngadto sa ilang mga paryente sa barangay Biasong aron dili maangin sa ilang away.
Dihang milakaw na ang asawa ug mga anak, si Cabanes giingong misuway na usab sa paghikog pinaagi sa pagbitay sa pisi apan nabantayan sa ilang mga silingan nga sila si Ritchie Badayos, Robert Oca ug Makmak Reyes hinungdan nga napakgang kini.
Ang maong mga silingan ni Cabanes maoy miputol sa pisi nga gibaligtos sa iyang liog ug gigaid ang pikas tumoy sa sagbayan sa ilang balay.
Gikuwenta nila nga mao kadto ang ika-upat nga pagsuway og hikog ni Cabanes.
Gumikan sa iyang kapakyas, mipalit na usab unta kini og laing pisi sa silingan nilang tindahan apan wala na siya baligyai tungod kay nasayud ang iyang mga silingan nga ihikog ra niya kini. Samtang ang asawa niini nga naglungotlungot, misumbong sa kapolisan sa Talisay gumikan sa pagkulata kaniya ni Cabanes nga iyang bana. Ang miresponde sa hangyo sa maong asawa mao sila si SPO2 Elmer Saladas ug PO2 Narciso Alforque ug sa ilang pag-abot sa balay sa magtiayon maoy mihimamat sa ilang mga mata ang nagbitay nga patay na nga si Cabanes.
Maayong pagkatuok sa liog niini sa kahugot sa tumoy sa pisi kansang pikas tumoy gigaid sa ilang sagbayan.
Ang Talisay Rescue Emergency Action Team (TREAT) daling miresponde sa alarma apan gideklarar nila nga wala nay kinabuhi si Cabanes.
Ang patay’ng lawas ni Cabanes gipaubos sa autopsy aron masuta ang tinuod nga hinungdan sa kamatayon niini. - BANAT NEWS