'Bayanihan' nagpatigbabaw sa Nob.1 ug 2

CEBU, Philippines - Gipasalamatan ni Mayor Michael Rama ang mga polis, mga barangay tanod, volunteers ug uban pang mga organisasyon nga mitabang nga magpabiling hapsay ug malinawon ang pagtamod sa adlaw sa mga minatay pinaagi sa pagbantay sa nagkadaiyang sam-ang sa siyudad sa Sugbo.

“Diha nato nakita nga nagpabilin gihapon nga buhi karong panahona ang bayanihan, baranggayan ug boluntarismo,” sumala pa ni Rama.

Sumala pa ni Rama nga saksi siya sa gipakitang kakugi sa kapulisan ug sa mga barangay tanod sanglit siya mismo ang misuroy sukad pa sa miaging adlaw hangtud kagahapon sa pipila ka mga pampublikong sam-ang sa siyudad.

Nagkanayon ang mayor nga mao kini ang resulta sa sayong pagplano sa programang Oplan Kalag-Kalag nga gidumala usab sa Cebu City Police Office ug sa uban pa nga sektor.

Nalipay usab ang mayor nga padayon gihapon karon nga alerto ang kapolisan sa pagbantay sa mga terminal, pantalan ug sa mga nag-unang kadalanan sa siyudad sanglit gituohan nga magbaha na usab karon ang mga pasahero nga gikan sa ilang mga probinsiya ug mobalik na dinhi sa siyudad.

Dugang pa niya nga ang importante kaayo ang pagtamod sa adlaw sa mga kalag busa gikinahanglan nga malinawon gyud ang mga sementeryo.  - BANAT NEWS