CEBU, Philippines - Underwear nalay nahibilin sa lawas sa mag-uyab nga Koreano ug Cebuana human kawata ang ilang mga senina samtang nag-night swimming sila didto sa usa ka beach resort sa sitio Fatima sa barangay Jubay , lungsod sa Liloan sa miaging gabii.
Ang mga biktima mao sila si Yangsoo Kim, 31, lumad nga taga nasud sa Korea, ug Sheryll Sabay, 21, dalaga nga taga barangay Poblacion Oriental sa lungsod sa Consolacion.
Si SPO4 Alex Pepito sa kapolisan sa Liloan miila sa suspetsado nga mao si Gerry Ayaste, 33, ulitawo, nga taga barangay Sacsac sa lungsod sa Consolacion.
Si PO2 Rotchele Jugalbot sa kapolisan sa maong lungsod nga nahinabi sa Banat News miingon nga samtang nalingaw sa pagkaligo sa dagat ang Korean national kuyog sa iyang hinigugma gibilin nila ang ilang mga sapot sa daplin sa dagat.
Ang suspetsado nga didto usab sa maong dapit daling mikawat sa mga senina sa mga biktima apan pipila ka mga tawo nga naligo usab sa maong dapit nakakita kaniya ug ila dayon kining gigukod.
Apan dihang naapikihan kini, milanit sa iyang armas de fuego nga usa ka kalibre 38 nga revolver ug gipusil ang mga tawo nga naggukod kaniya.
Maayo nalang kay wala makabuto ang maong armas ug naabtan sila sa kapolisan sa maong higayon hinungdan nga dali kaayong nasikop ang suspetsado.
Nasakmit sa kapolisan ang iyang armas nga may duha ka buhing bala uban sa duha ka linikit nga pinaugang dahon sa marijuana.
Nasakmit usab sa kapolisan ang mga sapot sa mga biktima gikan sa mga kamot sa suspetsado.
Kini naglakip sa duha ka karsones nga maong uban sa panit nga bakus, blouse, bra ug jacket.
Mikagulkol dayon sa bilanggoan ang maong suspetsado ug gitakda kining pasakaan og kaso karong liwas na sa adlaw sa minatay. - BANAT NEWS