Anti-cyber porno ordinance giumol ni Magpale

CEBU, Philippines - Aron mas mapakusgan ang kampanya batok sa cyber pornography dinhi sa Sugbu usa ka resolusyon ang giumol diha sa Hunta Probinsyal aron paghimo og ordinansang Anti-Cyber Pornography Ordinance of the Province of Cebu.

Ang maong resolusyon gipangamahanan ni Bise Gob. Agnes Magpale ug gisuportahan nila ni Bokal Peter John Calderon ug Bokal Jose Ribomapil Holganza Jr. kinsa pulos nailang mga nangusog batok sa pornograpiya dinhi sa lalawigan.

Ang maong ordinansahon nagkanayon nga sa modernong panahon karon ang mga tawo dali na kaayo ang access gamit ang mga computers ug internet ug pinaagi niini adunay mga bentahe nga makuha ang publiko.

Apan dili ikalimod matud pa sa maong ordinansahon nga gigamit na usab kini isip kagamitan sa cyber crimes sama sa cyber pornography ug ang gitumbok nga kanunay’ng naabusohan mao ang kabataan ug kababayen-an bugti sa ilang dungog ug sa gamay’ng kwartang bayad.

Matud pa sa ordinansahon nga kinahanglan mahatagan og proteksyon ang kabataan ug kababayen-an gikan niining mga mapahimuslanong negosyante sa internet .

Sa pagkakaron, aduna nay Republic Act 9775 (Anti-Child Pornography Act of 2009, Presidential Decree 603 (Child and Youth Welfare Code), Republic Act 7610 (Special Protection of Children Against Abuse, Exploitation and Discrimination Act), Republic Act 9262 (Anti-Violence Against Women and Children Act of 2004) ug Republic Act 9208 nga gitawag nga Anti-Trafficking in Persons Act of 2003.

Bisan aduna nay daghang mga balaod sa nasud nga gihimo aron batokan ang mga pagpangabuso sa kababayen-an nakita ni Magpale nga kinahanglan pa gyud nga adunay kaugalingong ordinansa ang lalawigan aron pagsigurong maimplementar kining mga balaora.

Lakip sa makonsiderar nga kalapasan sa maong ordinansahon mao ang pag-operate og cyber sex den gamit ang internet o uban pang electronic gadgets; paghaylo sa kababayen-an ug kabataan nga molambigit sa sex o pahimuon og mga law-ay nga trabaho atubangan sa web cam.

Ang malapason sa maong ordinansahon mag-atubang og pagkabilanggo usa ka tuig o ba kaha pagbayad og multang P5,000 o ba kaha ang duha ka silot ang ipahamtang depende sa korte.

Pagtangtang sa lisensya sa mga nag-operate sa negosyong susama niini.  - BANAT NEWS