CEBU, Philippines - Miduaw si Sr. Supt. Melvin Ramon Buenafe, hepe sa Cebu City Police Office (CCPO) ug midalit og buwak ngadto sa lubnganan ni anhing PO1 Noriel Luage diha sa Blessed Cemetery sa A. Lopez sa barangay Labangon kagahapon sa buntag.
Karung Disyembre mag-upat na katuig gikan nakalas si Luage human siya napusilan patay niadtong Disyembre 2007 sa dihang mi-serve sila og Search Warrant pinangulohan nila ni Supt. Rex Derilo nga nadestino pa kaniadto sa Criminal Investigation and Detection Group (CIDG)-7 ug hepe kaniadto sa Criminal Investigation and Intelligence Branch (CIIB) Chief Insp. George Ylanan uban nilang Delfin Bontuyan sa CIDG batok kang Boy Baclohan diha sa barangay Zapatera.
Si Baclohan nga gidudahan kaniadtong kanhi sakop sa New People’s Army maoy gitumbok sa kapolisan nga ‘middleman’ sa mga guns for hire nga nalambigit sa mga high profile murders dinhi sa Sugbu ug usa sa giingong gunman niini mao si Aristotle Aves kinsa nabilanggo na karon sa karsel.
Sumala pa ni Buenafe, ang kaisog ni Luage kinahanglang matupngan sa ubang mga sakop sa kapulisan nga dili mahadlok magpakamatay kun gikinahanglan alang sa ilang pagpanirbesyo.
Si Buenafe nga na-interbyu sa Tv5 News nagkanayon nga dako kaayo og kawad-on sa PNP ang pagkamatay ni Luage.
Si Chief Insp. Aileen Recla nga kanhi kauban ni Luage sa CIIB kaniadto ug karun mao nay hepe sa Punta Princesa Police Station mitug-an usab nga di gyud niya makalimtan si Luage.
“Pagkamatay ni Luage nahugno ko uy, kay buotan to bataa,” paghandom pang Recla kinsa mihulagway ni Luage nga seryoso sa iyang pagkapulis.
Si Elvira Navaja iyaan ni anhing Luage nga miduaw sa lubong kagahapon mitug-ang simple ra kaayo og damgo ang iyang pag-umangkon nga buhion niya ang iyang pamilya sa iyang kaugalingong singot. Si Luage adunay duha ka anak sa iyang asawa.
Atol sa hitabo niadtong Disyembre 2007, si Luage kauban sa grupo sa CIIB ug CIDG-7 nga maghatud unta og warrant sa panimalay ni Baclohan diha sa D.Jakosalem St.sa barangay Cogon-Ramos apan misukol ang naulahi sa mga polis.
Si Luage agresibong miboluntaryo pagsulod sa balay kauban si Bontuyan apan sa pagsulod ni Luage sa iyang ulo gidul-itan kini og pusil ni Baclohan diha sa tampihak hinungdan nga mibawos si Bontuyan. Si Luage ug Baclohan patay diha-diha. Si Derilo nga nangulo sa maong operasyon nga nahinabi sa mga tigbalita nagkanayon nga dili gyud niya makalimtan ang ‘heroic act’ ni Luage. (BANAT NEWS)