'Number Coding' sa Mandaue PUJS Gisugyot

CEBU, Philippines - Bukas si Konsehal Alvin Dizon nga amendahan ang City Ordinance 1837 nga maoy nagpugong sa pagsulod sa mga jeepney gikan sa Mandaue nga makasulod dinhi sa siyudad ug usa sa sugyot niini mao ang ‘number coding.’

Matud pa ni Dizon nga angayang hatagan og importansiya ang katawhan nga sumasakay nga maoy unang naapektohan sa maong ordinansa.

Gipasabot hinuon ni Dizon nga makatabang usab ang “number coding system” aron maminosan ang trapiko ug obserbahan ang resulta niini sulod sa pipila ka adlaw kung epektibo ba kini dayon motabok dayon sa laing solusyon.

‘Such move is beneficial to the riding public. But we have to strictly enforce regulatory mechanism to avoid traffic congestion,” sumala pa ni Dizon.

Dugang pa niya nga iya na kining gitaho ngadto kang Bise Mayor Joy Augustus Young kinsa interesado usab sa maong sugyot. Una na usab nga mipadayag kaniadto si Konsehal Edgardo Labella nga bukas usab siya nga usbon ang maong ordinansa.

Sumala pa ni Labella nga ang mga jeepney gikan sa Mandaue nag-alagad usab sa katawhan sa siyudad sanglit duna puy nagtrabaho sa maong dapit ang naggikan sa dakbayan sa Sugbo.

Samtang nagpadayon gihapon karon ang pagtuon sa City Traffic and Operations Management (Citom) kalabot sa maong isyu.

Ang CITOM maoy gitugyanan ni Mayor Michael Rama nga moumol og mga solusyon niini sanglit sila man ang suheto sa istado sa kadalanan sa siyudad. - EIM (BANAT NEWS)