CEBU, Philippines - Usa ka 24-anyos nga pintor ang gidakop sa kapolisan human gitumbok sa silingang 14-anyos nga dalagita nga milugos kaniya sa kalibunan sa barangay Cabcaban sa lungsod sa Barili atol sa gipahigayung disko sa maong lugar niadtong Domingo sa 1:00 sa kaadlawon.
Ang suspek kansang pangalan gipugngan sa Banat News aron dili mailhan ang biktima giingong ig-agaw sa uyab sa biktima ug suod niya kining higala nga taga barangay Tal-ot.
Matud ni SPO1 Estellore Cañete sa Women’s Desk sa Barili Police Station dihang nahinabi sa Banat News nagdisko ang biktima ug ang suspek uban sa ilang mga barkada diha sa barangay Cabcaban nianang tungora.
Nabantayan nalang sa biktima nga nawagtang ang iyang cellphone maong iyaha kining gisubay-subay hangtud nga miduol ang suspek ug mipasalig nga tabangan ang dalagita pagpangita sa cellphone diha sa gawas.
Apan pag-abot nila sa ngitngit sa dapit kalit gibitad sa suspek ang biktima ug pugsanong gipahigda sa kalibunan. Matud pa hubog ang biktima niadtong tungora ug wala kini dag-anan sa suspek bisan pa sa iyang paglugnot hinungdan nga nalugosan siya niini.
Matud pa nga walay nakadungog sa pagsige og singgit sa biktima tungod sa kakusog sa sounds sa diskohan.
Pagkahuman niini gibiyaan sa suspek ang biktima kinsa midiretso og pauli kanila ug misumbong sa nahitabo.
Ang suspek kinsa gidakop sa kapolisan kusganong mihimakak sa alegasyon samtang ang biktima gipahiling na sa tambalanan. (BANAT NEWS)