Sa talisay gihapon 2 ka bata gi-shotgun sa sikyu

CEBU, Philippines - Duha ka menor de edad nga gikatahapang kawatan ang gipamusil kagahapon sa buntag sa gwardiyang nagbantay sa gisirad-ang merkado publiko sa barangay Tabunok, dakbayan sa Talisay.

Ang nakapusil nga gwardiya gamit ang iyang service shotgun mao si Luis Pelegrino Jr., 39, nga sakop sa Lancer Security Agency.

Usa sa mga biktimang menor nagpanuigon kini og 16-anyos nakaangkon og upat ka lungag sa tiil agi sa mga bolitas nga sulod sa bala sa shot gun samtang ang 14-anyos naigo usab sa walang tiil.

Ang duha ka menor parehong mga residente diha sa sitio Mananga, barangay Tabunok daling gidala ngadto sa Talisay City District Hospital.

Samtang ang gwardiya boluntaryong mitahan sa iyang kaugalingon ngadto sa kapolisan lakip na sa shotgun nga iyang gigamit.

Si Pelegrino nga nahinabi sa Banat News kagahapon nagkanayon nga samtang nag-estoryahanay silang duha sa iyang head guard nga si Ramon Bayon dunay tawo nga miduol kanila nga nagpahibawong dunay duha ka tawo nga misulod sa usa ka tindahan nga nasirado na.

Matud ni Pelegrino nga uban sa laing gwardiya gisusi nila ang maong tindahan ug nakita nilang ang roll-up nga pultahan niini mikang-a na ug duna sila’y nakitang mga tsinelas.

Si Bayon daling mitawag og polis apan sa pagbiya niini mao say paggawas sa mga biktima kinsa misuway og dagan ug wala mopatuo sa mga gwardiya dihang gipahunong.

Matud ni Pelegrino nga gipasalbahan niya ang maong mga bata tumong sa yuta hinungdan nga nangaigo ang mga tiil sa duha. Si Pelegrino nagkanayon nga nakuha niya gikan sa maong mga menor ang mga sensilyo nga gituohang gikan kini sa tindahan nga ilang gisulod.

Ang tag-iya sa tindahan nga si Peter Sy mibutyag nga duna pay sulod nga mga stocks ang iyang tindahan uban niini mga back order o “BO” apan dunay mapahimuslan pa.

Sa laing bahin, si Superintendent Eddie Recamara, hepe sa Talisay City Police Station sa pakighinabi sa mga tigbalita kagahapon nagkanayon nga posibleng mapasakaan og frustrated homicide si Pelegrino.(BANAT NEWS)