CEBU, Philippines - Swerteng nabuhi ang usa ka 20-anyos nga lalaking gradwado og kursong aircraft maintenance (Aircraft Technology) kinsa giingong nakit-ang milayat gikan sa Marcelo Fernan Bridge sa habig sa barangay Umapad, dakbayan sa Mandaue sa miaging gabii apan gidala gihapon sa tambalanan.
Ang milayat gumikan sa depression giilang si John Steve Cliford Incorporado, 20, taga sitio Nonoc sa barangay Tabunok, dakbayan sa Talisay.
Si Inspector Wilson Abot, hepe sa Presinto 5 sa Mandaue City Police Office (MCPO) nga nagbase sa barangay Opao nga nahinabi sa Banat News miingon nga malinawon unta kaayo ang palibot sa maong dapit apan kalit lang nga natugaw sa pagkahagsa sa maong lalaki gikan sa ibabaw sa Marcelo Fernan Bridge ug mitimpasaw ngadto sa dagat.
Ang iyang duha ka mga sakop nga sila si PO1 Felix Sarte Cabahug ug PO1 Hardly Cosedo nga gidestino sa pagbantay sa ubos nga bahin sa maong taytayan nakuratan sa pagkahagsa ni Incorporado sa dagat.
Matud ni Abot bisan sa gihabugong gibana-banang kapin 50 ka tiil suwerteng wala magrabehi si Incorprado ug nakakuha dayon og sakayan ang maong duha ka polis ug nahaw-as kini gikan sa dagat.
Si Abot nagkanayon nga gitug-anan siya ni Incorporado nga naguol kini og maayo tungod kay bisan nakatapos siya og kurso pakyas kini sa pagkaplag og trabaho.
Nagtuo si Abot nga gibati kini og kauwaw pagpauli sa panimalay sa iyang iyaan nga maoy nagpatungha kaniya hinungdan nga kini milayat sa maong taytayan.(EIM) (BANATNEWS)