Anak sa biktima sa disgrasya librehon sa kolehiyo

CEBU, Philippines - Gipasalig ni 3rd district Congressman Pablo John “PJ” Garcia nga mahatagan og libreng college education ang mga anak sa pamilyang nabiktima sa trahedya sa trak didto sa lungsod sa Barili niatong bulan sa Agosto.

 Matud pa ni Kongresista Garcia nga andam na ang iyang gitaganang gahin alang sa scholarship sa mga anak sa mga ginikanang namatay human mahagbong   sa lupot ang trak de karga nga ilang gisakyan.

Matud pa sa kongresista nga gusto niyang ang mga anak sa   makalolooy nga mga ginikanan nga naangin sa maong hitabo   makapadayon   sa pagtungha sa kolehiyo ug makatabang og dako sa paglambo sa pagpuyo sa mga biktima.

Ang representante sa ikatulong distrito   miingon nga sa pagkakaron wala pay nakapahimulos sa iyang scholarship program kay sagad sa mga anak sa   mga biktima nagtungha pa man sa publikong tulunghaan sa high school.

Dugang pa niini nga gisugdan na karon sa iyang buhatan ang pagkompleto sa mga papeles alang sa buot nga mupahimulos sa iyang gitanyag nga scholarship program. (BANATNEWS)