CEBU, Philippines - Hayan ipagawas sa lega sa mga lokal nga opisyal ang ilang hiniusang suporta sa gitinguhang umolon sa mga sakop sa hunta probinsiyal nga Provincial Anti-Obscenity Board pagtuman sa paningkamot ni Vice Governor Agnes Magpale.
Gipaabot nga ang mga stakeholder kun manginlabot niining proyektoha mao ang mga lega sa mga mayor, bise mayor, konsehal sa kalungsoran, mga barangay kapitan ug sangguniang kabataan kinsa maoy kuhaan og pulso alang sa pag-umol sa maong hunta.
Ang buhatan ni Mayor Nelson Garcia sa Dumanjug kinsa sa samang higayon maoy presidente sa League of Municipality of the Philippines (LMP) Cebu Chapter naglaraw nga karong bulan sa Nobiyembre mitingon niya ang mga lokal nga opisyal sa lalawigan aron tukion kining isyuha.
Kauban sa LMP sa maong miting mao ang Vice Mayors League, Philippine Councilors League of the Philippines (PCL) nga gipangulohan ni Bokal Ivy Durano Meca, Association of Barangay Council nga gipangulohan ni Bokal Rebomaphil Joey Boy Holganza ug SK Federation uban ni Bokal Willaime Caminero.
Kini aron mahimong konkreto ang ilang saad nga suporta alang sa katukoran sa Provincial Anti-Obscenity Board.
Ang nahisgutang mga local nga official miingon nga kinahanglan kaayo ang nahisgutang grupo maoy mogukod niadtong mga balay kahilayan nga nagpahimulos sa mga kababayen-an ug kabataan ug labaw sa tanan ang pagpugong nga magpublikar ang mga hilas ug mga law-ay nga mga hulagway. (BANATNEWS)