CEBU, Philippines - Patay ang usa ka 26-anyos nga lalaking nagrambo- rambo ug misulong aron unta ipanimawos ang kamatayon sa iyang amahan nga giingong gipatay sa iyang silingan diha sa sitio Sacsac sa barangay Abucayan sa lungsod sa Balamban niadtong Domingo sa alas 11:52 sa buntag.
Ang biktima nga patay diha-diha mao si Josephus Barios, 26, samtang ang suspek mao ang iyang silingan nga si Jopel Catayas, 21, ug pulos molupyo sa nahisgutang lugar.
Matud ni PO2 Cesar Climaco sa Balamban Police Station dihang nahinabi sa Banat News base sa imbestigasyon ang biktima nanganti nang daang ini og tapos sa pangadye sa kamatayon sa iyang amahan manimalos kini ngadto sa mga mipatay sa iyang papa.
Niadtong Domingo nahitabo ang adlaw nga pagtapos sa pangadye sa iyang amahan ug pagkahuman niini gikatahong gisambilay sa biktima ang iyang pugakhang, nagbitbit og usa ka kalibre .38 ug nagtak-in og sanggot dayong sulong sa balay ni Catayas kauban ang iyang mga barkada.
Apan sa pag-abot sa biktima diha sa balay sa suspek nakabantay ang naulahi nga niadtong tungora naghigda ug sa paglili sa mga nanulong nakalayat na kini og bintana ug mikaratel og dagan pahilayo.
Ang biktima kinsa buot gyud nga makabawos wala makabantay nga mipahipi lang sa kalibunan si Catayas ug nag-atang kaniya ug sa pagtungod sa biktima sa suspek gipusil kini dayon sa naulahi makausa diha sa dughan. Wala na makakablit pa ang biktima sa iyang armas kinsa daling nalup-og ug gibiyaan nalang sa suspek.
Ang biktima daling gitabang sa mga mirespondeng polis apan patay na kini. Ang kapulisan padayun pa sa ilang manhunt operation sa pagsuwat ning balita. (BANATNEWS)