Mga inspector sa timbangan gisaway

CEBU, Philippines - Ang kinalit nga pag-inspection sa mga timbangan sa merkado publiko sa dakbayan sa Mandaue nakadawat og pagsaway tungod kay wala makig-alayon ang pribadong grupo sa mga inspector   sa buhatan sa market administrator.

Si market administrator Mosulini Soliva mibutyag sa Banat News nga wala siya pahibaw-a nga may grupo nga mo-inspection sa mga timbangan sa mga vendor sa merkado hinungdan nga daghan kaayong nasakpan nga timbangan   n ga tikasan.

Dugang pa niya nga nahinangha na lamang siya dihang migawas ang taho nga ang section sa isdaan ug bugasan sa merkado publiko maoy gipuntariya   sa mga inspector.

Si Vic Sapio nga maoy pangulo sa Consumers Right and Economic Welfare (CREW) maoy nangulo sa mga team nga misusi sa mga timbangan sa sulod sa merkado ug daghan kaayong nasakpan nga mga timbangang tikasan.

Matud pa ni Soliva nga dili nila matataw kun giunsa pag-ila sa maong mga sakop sa consumers group nga gi-tamper ang maong mga timbangan nga ilang giinspection.

Gipasabot ni Mosulini nga higpit nilang gidili sa mga manindahay ang paggamit og mga timbangan nga kuwang ang timbang kay usa kini ka pagpanikas ngadto sa ilang mga kustomer.

Dugang pa niya nga sa ilang higpit nga pagbantay   sa mga timbangang tikasan naka-imbargo sila og 17 ka timbangan nga tikasan.Gipasabot ni Soliva nga sa sulod sa merkado publiko adunay timbangan nga ilang gipahimutang nga husto og timbang nga maoy dangpan sa mga konsumedor kun magduda sila nga kuwang sa timbang ang ilang pinalit.

Si Soliva miingon nga sa unang higayon nga masakpan ang naghupot og tikasan nga timbangan P500 ang multa niini, P750 sa ikaduha ug sa ikatulo P1,000 ug   ang hingpit nga pagpasira sa maong tindahan.  - BANAT NEWS