Gipatay sa hantakan

CEBU, Philippines - Maayong pagkabuslot sa ulo sa usa ka lalaki nga napalgang nagbuy-od sa hawan nga lote nga gihimong hantakan diha sa sitio Kalubihan, barangay San Nicolas pasado alas dose sa tungang gabii kagahapong adlawa.

Ang biktima nailhan nga si Reynaldo Dollete, 42, molupyo sa maong lugar ug nakaangkon og samad pinusilan sa iyang ulo.

Sa imbestigasyon sa kapolisan nasayran nga ang biktima naghantak sa nahisgutang lugar uban sa pipila ka higala dihang kalit mipatim-aw ang usa ka lalaki ug kalit midul-it pagpusil sa ulo sa biktima.

Dihang nahagba si Dollete hinungdan sa pag-alibwag sa mga sugarol sa kahadlok nga maapil.

Dali usab midagan dayon ang maong lalaki padulong sa usa ka motorsiklo ug miikyas palayo sa maong lugar.

Ang biktima nga naigo sa ulo wala na madala sa tambalanan tungod kay namatay kini dayon. Usa ka kabhang sa kalibe 45 nga bala ang nakuha sa mga imbestigador diha sa crime scene.

Ang kapolisan wala pay matumbok nga responsable sa krimen ug padayon pang nagsubay sa background sa gipatay. Gisusi pa usab kung ang motibo sa krimen may kalambigitan ba sa maong sugal.