Survey sa mga malnourished sa Talisay giawhag

CEBU, Philippines - Tutukan sa dakbayan sa Talisay ang problema sa malnutrisyon sa tinguhang mamenusan kini kung dili ma hingpit nga maputol ilabi na diha sa mga naghigwaos nga mga dapit.

Si Konsehal Danny Caballero sa dakbayan sa Talisay nanawagan sa health office sa pagpahigayon og survey kabahin sa panglawas sa kabataan ilabi na kadtong naa magpuyo sa mga naglisod nga mga lugar aron aduna silay magamit nga sumbanan sa paghimo og mga lakang pagsulbad sa problema sa malnutrition.

Si Caballero uban sa mga kaalyado niyang konsehal nga ubos sa oposisyon nga sila si Romeo Villarante ug Val Ylanan nagpahigayon og feeding program ngadto sa 22 ka mga barangay sa Talisay.

Giangkon ni Caballero nga mao nilang lakang temporaryo lang nga solusyon sa problema ug kinahanglang aduna gyuy survey nga buhaton aron masuta ang gidaghanon sa malnourished nga bata sa siyudad.

Matud usab sa konsehal nga sa gipahigayong survey sa National Nutrition Council-7 niadtong tuig 2008 sa 12 ka mga siyudad dinhi sa rehiyon ang daghan og malnourished ug ang Talisay maoy anaa sa unang pwesto.

Ang mga pre-schoolers nga gipaubos sa Operation Timbang nagpanuigon gikan sa zero o wala pay edad ngadto sa 77 months.

Kahinumduman nga sa maong sitwasyon ang siyudad milusad og barangay-based feeding projects ug kadtong makapapas sa malnutrisyon sa ilang barangay pasidunggan.

Sa milabay’ng buwan si Kongresista Eduardo Gullas sa unang distrito sa lalawigan sa Sugbo mipagawas og P315,000 nga budget alang sa feeding programs sa Talisay.

Ang maong proyekto nag-target sa mga batang nagpangidaron gikan sa tulo ka tuig ngadto sa singko-anyos kinsa mga na-enroll diha sa mga day care centers. Ang siyudad duna nay mga feeding projects alang sa kabataan apan si Caballero nagkanayon nga walay gipahigayong follow-up nga pagtuon kung ang maong proyekto naglihok o epektibo ba. - Brenda D. Batuto/EIM (BANAT NEWS)