CEBU, Philippines - Usa ka ginang nga gipasanginlang notadong mamaligyaay og ginadiling drugas ang nadakpan sa kapolisan sa lungsod sa Borbon pasado ala-una sa miaging adlaw sa sitio Galaban barangay Poblacion.
Si Letecia “Lete” Espinosa, lumad nga nagpuyo sa barangay Marigondon siyudad sa Lapu-lapu ug kasamtangang nagpuyo sa nahisgutang lugar, samtang ang kapuyo niini nga naila sa pangalang Keith Arnejo nga molupyo usab sa lungsod sa Sogod nakaipsot.
Sa pakighinabi sa Banat News sa hepe sa kapolisan sa lungsod sa Borbon nga si Chief Insp. Emiliano Igot mibutyag kini nga nakadawat sila og impormasyon kalabot sa pagpamaligya ni Espinosa og shabu sa maong lugar.
Sa dihang ila kining gipaubos sa surveillance sulod sa tulo ka semana, nagpositibo kini hinungdan sa gihimo nilang buybust operation niadtong milabay’ng adlaw batok niini.
Atol sa operasyon, mipalit ang poseur buyer og usa ka paketeng shabu ug dihang gitunol ni Espinosa nakabantay kini dayon nga polis ang mipalit kaniya ug mikaratel kini og dagan.
Didto na kini maabti sa likod nga bahin sa balay sa iyang silingan samtang nakaipsot ang kapuyo niini.
Nakuha gikan ni Espinosa ang pito ka sachet sa gituohang shabu nga gipasusi sa PNP Crime Laboratory.
Matud pa ni Igot nga hilabihan nga ka idlas ang duruha ug gituohang nangabang ra kini sa maong balay aron mamaligya og shabu nunot sa kapistahan sa maong lugar.
Butyag usab ni Igot nga anaa sa ilahang PNP drug watchlist ang ngalan ni Espinosa. - Lesley Caminade-Vestil/EIM (BANAT NEWS)