Re-Routing sa mandaue ipatuman

CEBU, Philippines - Maapektahan ang mga biyahe sa mga pasaheroan gikan sa dakbayan sa Lapulapu sa re-routing nga ipatuman sa Traffic Enforcement Agency in Mandaue (TEAM) aron maluag ang mga dalan paingon sa sementeryo sa barangay Guizo karong Nobiyembre 1 ug 2 nunot sa Kalag-kalag.

Si Edwin Ermac nga maoy executive director sa TEAM sa press conference miingon nga ang mga pasaheroang gikan sa dakbayan sa Lapulapu ra hinuon ang maapektohan sanglit mao man kini ang ilang naandang agianan sa matag adlaw sa ilang pagbiyahe paingon sa maong dakbayan.

Aduna unyay mga traffic signs ang ipamutang sa dalan aron magiyahan ang mga motorista sa alternatibong dalan. Dugang pa ni Ermac nga maapektohan usab ang mga traysikol nga nagbiyahe gikan sa barangay Maguikay nga mopaingon sa merkado publiko sa tuyo nga kalikayan ang panaghuot sa mga sakyanan sa mga sementeryo nga nahimutang sa barangay Guizo.

Matud pa ni Ermac sa maong mga adlaw sa kasaulogan ilang ipadayon ang pagdakop sa mga traysikol nga nagbaton og mini nga prangkisa.

Gitataw niya nga dali nila mailhan ang mobiyahe nga mga traysikol nga mini ang prangkisa tungod kay wala sila’y business plates sa ilang mga side cars.

Atol usab sa maong mga adlaw walay tugutang makabakasyon sa mga sakop sa TEAM aron makatabang sa pagbantay sa trapiko.

Gihangyo usab niya ang mga barangay kapitan sa pag-abag kanila pinaagi sa pagpakatap sa ilang mga barangay tanod aron matabangan ang pagpatunhay sa kahapsay ug kalinaw atol sa maong mga adlaw. - Romeo T. Limpangog/EIM (BANAT NEWS)