DPWH desidido flyover tukoron

CEBU, Philippines - Sinyas nalay gipaabot ug sugdan na gyud unta sa pagladlad sa kontraktor ang mga material sa flyover nga itarok sa MJ Cuenco Avenue ug sa Gorordo ning dakbayan sa Sugbo.

Mao kini gibutyag ni public information officer Marie Nillama sa Department of Public Works and Highways (DPWH) 7 kinsa nagkanayon nga ang pahibawo gikan sa central office  sa DPWH sa Manila   bahin sa pagkasuspenso sa maong proyekto maoy mipakgang sa DPWH gikan sa pagsugod sa maong trabaho.

Matud pa ni Nillama nga ang mipakanaog sa suspension order mao si   Undersecretary Romeo Momo for Regional Operations sa DPWH .

Gipasabot pa niya nga kung wala pa maabot ang memo gikan sa ilang mga labaw, nasugdan na diay unta ang konstruksyon sa flyover.

Matud pa ni Nillama nga iyang nahinabi ang head sa Bids and Awards Committee DPWH-7 nga si Engr. Rose Gepte ug  didto iyang nasayran nga kompleto na gyud unta ang mga papeles aron masugdan na ang konstruksyon sa maong proyekto.

Kahinumdoman nga ang ulohang buhatan sa DPWH misaysay nga angayan una sulbahon ang mga isyu kalabot sa maong proyekto ilabi na sa pagsupak sa pipila ka sektor.

Miingon ni Nillama nga una ipatumang hingpit ang maong proyekto ipahigayon una sa kagamhanan ang mga public hearing buwahan makuha ang pulso sa katawhan kinsa pabor ug kinsa usab ang mosupak niining maong proyekto.

Si Mayor Michael Rama miingon nga gusto niyang walay mga politiko nga motambong sa mga public hearing bahin sa flyover samtang si Kongresista Tomas Osmeña nagkanayon nga motambong gayud siya pagsiguro sa maong mga hearing. - Sanden J. Anadia (BANAT NEWS)