Griffiths gipasaligang masikop

CEBU, Philippines - Ang Briton nga suspetsado sa pagdagit ug pagpatay sa 6 anyos nga si Ellah Joy Pique gituohang madakpan    ug makaatubang sa iyang kaso dinhi sa Sugbo.

Kini human mopasalig ang usa ka dakong opisyal sa embahada sa Britanya ngadto kang Governor Gwendolyn Garcia nga paningkamotan nila nga masikop si Ian Charles Griffiths, ang uyab ni Bella Ruby Santos nga kauban niining akusado   sa maong kaso.

Si Santos nagtingkagol na karon sa prisohan sa Naga City Police human siya hidakpi gikang nagtago-tago didto sa Metro Manila   sa unang semana ning buwan sa Oktubre.

Gani si Garcia mapasalamaton kaayo kang Trevor Lewis ang Deputy Head of Mission   sa British Embassy   kinsa miduaw sa iyang buhatan sa miaging adlaw ug mipasalig nga motabang sila sa pagsikop kang Griffiths.

Si Lewis nagkanayon nga dako ang tinguha nila nga motabang sa pagsulbad sa maong kaso ug iya kining ipadangat sa kadagkoan sa ilang nasud aron molihok ang kapolisan didto ug ikapadala si Griffiths nganhi sa Sugbo aron moatubang sa iyang kaso.

Si Griffiths sa pagkakaron usa na usab ka “wanted” dinhi sa Sugbo   sama ni Santos kaniadto sa wala pa siya hidakpi.

Matud pa ni Lewis nga iyang paningkamotan nga madakpan si Griffihs pinaagi sa pagpakig-alayon sa mga kapolisan sa ilang nasud   ug ingon man dinhi sa lalawigan aron mataral sa hukmanan dinhi sa Sugbo ang maong Briton.

Ang pasalig ni Lewis gikalipay ug gikahingawa kaayo sa gobernador busa mapasalamaton kaayo si Garcia kang Lewis.

Gitug-an sa gobernador   nga gipabati gayud   niya   ngadto kang Lewis ang iyang kahingawa sa biktima nga si Ellah Joy Pique nga nagkinahanglan   og hustisya sa iyang kamatayon.

Si Pique, naglakaw pauli sa ilang balay sa barangay Calajoan, lungsod sa Minglanilla gikan sa eskuylahan niadtong Pebrero 8, 2011 dihang gidagit kini sa mga suspetsado ug napalgang patay na didto sa lungsod sa Barili pagkaugma. - WC (BANAT NEWS)