Sikyu gitagod-tagod sa trabahante

CEBU, Philippines - Gitagodtagod ang ulo ug kalawasan sa usa ka gwardiya sa sulod sa construction site nga iyang gibantayan human kini tigbasa sa gikaaway nga trabahante alas-5 pasado ang takna kagahapon sa buntag sa barangay Tipolo, dakbayan sa Mandaue.

Ang biktima mao si William Morandarte, 43, sakop sa Ropisa Security Agency ug molupyo sa sitio Maharlika sa Tipolo sa dakbayan sa Mandaue ug nadestino sa Phil Metal Deca Homes Construction nga nahimutang sa maong dapit.

Samtang gikatahong miangkon sa krimen ang usa sa mga trabahanteng gikaaway sa biktima sa nangaging adlaw nga si Harazim Navarro, 20, lumad nga taga Curbada, barangay Magdugo, dakbayan sa Toledo.

Si PO1 Roldan Balimbing sa Investigation Detection Management Bureau (IDMB) sa Mandaue City Police Office (MCPO) miingon nga wala na mahitsura ang ulo nga bahin sa biktima nga giingong gitigbas sa suspetsado sa makadaghan nga higayon. Lakip sa naangkong samad sa biktima nahimutang sa liog ug nawong nga maoy nakaingon sa iyang kamatayon, ang patay’ng lawas niini nadiskubrehan sa roving guard nga si Joel Pogoy.

Human madiskubrehi ang lawas sa biktima dali niyang gipahibalo ang project engineer nga si Dave Matagas kinsa daling mitawag sa kapolisan.

Si Homicide chief P/Insp.Ramil Morpos kinsa misukit-sukit dayon sa mga trabahante mitumbok sa tulo nila ka kauban apan ang tulo mihimakak og kalambigitan niini.

Dihang gidala ang tulo sa ilang buhatan ug gitagsa-tagsa sa pagpangutana si Navarro maoy gikatahong miangkon sa krimen tungod kay giingong gipakauwawan siya ug gihulgang patyon sa biktima.

Sumala pa nga si Navarro mibutyag sa mga polis nga nagsugod ang dili nila maayong pagtinagdanay sa biktima human usa sa iyang mga kauban ang nakapunit og P14,000 sa usa ka taksi nga ilang nasakyan ug ilaha kining gibahin-bahin.

Apan ang biktima kinsa nakadawat sa maong balita giingong naglagot nga wala apila sa bahin ug niadtong Biyernes sa gabii gikatahong gibundakan siya og pultahan sa biktima ug dihang iyang gipangutana og “Unsay problema Tsip?”

Gitubag siya niini og “Ikaw unsay problema nimo?” dayong ibot sa armas niini ug gialegar sa biktima nga mibahad kini dayon kaniya sa pag-ingon “Last na lang ka, sa makauna lang.”

Tungod niini gikatahong wala na makatulog ang suspek ug nahadlok sa bahad ug nianang pagkakaadlawon gikuha niya ang bolo sa kauban ug giduol si Morandarte ug gitigbas niya kini makadaghang higayon.

Ang suspek gikatakdang pasakaan og kasong murder ug kasamtangang gitanggong diha sa karsel sa Centro Police Station. - REIM (BANAT NEWS)