2 mil polis ipakatap sa CPPO sa Nob. 1,2

CEBU, Philippines - Mipahigayon og inspection ang pangulo sa kapulisan sa probinsya sa Sugbu nga si Sr. Supt. Patrocinio Comendador ngadto sa iyang mga sakop kagahapon diha sa provincial headquarters.

Ang maong mga polis idugang sa mga kalungsoran ug siyudad nga dunay dagkong sam-ang atol unya sa Kalag-Kalag karung sunod semana.

Si Comendador nga nahinabi sa mga tigbalita nagkanayon nga karung Lunes ipadala ngadto sa lungsod sa Balamban, Liloan, Consolacion, siyudad sa Toledo ug Talisay ug uban pang lungsod nga dunay mga dagkong sam-ang.

Samtang aduna say gipabiling reserve force nga mag-estambay sa provincial headquarters aron maoy makaresponde kung gikinahanglan.

Matud ni Comendador kapin sa 2 mil ka polis ang iyang ipakatap sa tibuok probinsya atol sa adlaw sa mga Santos ug mga patay wala pay labot sa augmentation gikan sa Regional Public Safety Batallion (RPSB) kanhi Regional Mobile Group (RMG) ug mga sakop sa 78th Infantry Battalion.

Aduna say ipapilit ang kapulisan sa mga sam-ang nga mga pahimangno sa katawhan sa mga dautang elemento nga mopahimulos sa kahigayonan.

Usa na niini ang pagdili pagsul-ob og mga mahalong alahas ug pagdala og dagkong kantidad, pagdili sa mga mahait nga hinagiban, pag hubog, pagpasul-ob og ID sa mga bata ug pagsigurong sirado ilang balay aron di makawatan o masunogan. (BANATNEWS)