Opisyal sa Hongkong mibisita sa Capitol

CEBU, Philippines - Mibisita dinhi sa Sugbo ang mga sakop sa Consular Corps sa nasud sa Hongkong alang sa ilang tulo ka adlaw nga Special Familiarization Tour.

Si Governor Gwendolyn Garcia mitanyag kanila sa usa ka welcome dinner didto sa Marco Polo Hotel   sa miaging adlaw, usa sa nabatasan na sa kagamhanan sa lalawigan sa Sugbo sa pag-abi-abi sa grupo sa mga langyaw nga turista nga mosuroy sa Sugbo.

Si Al Tanaib Bader, ang Dean sa Hongkong Consular Corps ug Consul General sa Kuwait nagkanayon nga nakadayeg kaayo sila sa pagkamaabi-abihon sa mga Sugboanon sa ilang unang pagtaak dinhi sa lalawigan.

Si Bader mipadayag sa ilang kinasingkasing nga pagpasalamat sa gobernador sa lalawigan sa Sugbo tungod sa mainitong pag-abiabi kanila gikan pa sa tugpahanan sa Mactan hangtud nga sila napahiluna sa mga hotel dinhi sa Sugbo.

Samtang ang Consul General sa Romania nga si Vasile Sorin miingon usab nga mobalik gyud siya dinhi sa Sugbo uban sa ilang pamilya tungod kay gawas sa pagkamaabi-abihon sa mga Sugboanon, kompleto usab ang mga pasilidad dinhi alang sa mga turista sama sa hotel, beaches ug uban pang mga resort nga maoy sagad tapuk-an sa mga turista. (BANATNEWS)