Pag-ayo sa airport gikalipay sa taga Bantayan

CEBU, Philippines - Suportado sa mga mayor sa tulo ka mga lungsod sa isla sa Bantayan ang plano ni Governor Gwendolyn Garcia nga ayuhon ug palamboon ang airport sa nahisgotang isla nga anaa mahimutang sa lungsod sa Sta. Fe. Matud ni Sta. Fe Mayor Jennifer Illustrisimo nga daghang nalipay sa maong lakang sa gobernador sanglit kini nagpasabot og alternatibong matang sa transportasyon padung sa isla ug padung sa syudad sa Sugbo nga mas paspas, mas hamugaway ug mas komportable.

Sigun pa ni Illustrisimo nga ang kahingpitan unya sa proyekto ni Gov. Gwen Garcia nga mao ang airport sa Bantayan Island magkahulogan usab og dugang kalambuan sa ilang lungsod.

Sila si Bantayan Mayor Ian Christopher Escario ug Madridejos Mayor Salvador dela Fuente sa ilang bahin namahayag nga sa panahon nga mahuman na ang maong proyekto ni Garcia mas daghan pa unyang mga lokal ug langyaw nga turista ang modogok sa ilang isla.

Matud pa ni Escario nga pinaagi sa nahisgutan nga airport, mahimo na unyang makig-compete ang Bantayan Island sa Boracay tungod sa kaanindot sa mga tourist destination sa isla nga maoy kinaham sa mga turista.

Samtang si Mayor dela Fuente nagkanayon nga nagpasalamaton kaayo sila sa gobernador tungod sa pagpalambo sa turismo sa ilang lungsod. (BANATNEWS)