Manager gipusil angol sa kustomer

CEBU, Philippines - Kritikal ang kahimtang sa manager sa kompaniya nga tigpautang og motorsiklo human pusila sa iyang customer nga giimbargohan niya og motorsiklo didto sa barangay Lourdes siyudad sa Bogo niadtong Huwebes sa alas 8:50 sa gabii.

Ang biktima mao si Marsan Puebla Dua, 33 , minyo ug manager sa Wheeltic Motor Sales Corp. nga taga barangay Maslog siyudad sa Danao.

Samtang ang suspek mao ang iyang customer nga si Benhur Igdanes Angcajas, 30, ulitawo, apan adunay kapuyo ug taga barangay Pandan, sa dakbayan sa Bogo.

Si PO2 Joseph Salvador, imbistigador sa Bogo City Police mibutyag sa Banat News  nga ang suspek nasuko   human imbargoha ang iyang gidata-datahang motorsiklo   tungod sa kapakyas niya pagbayad sa iyang datahan.

Mipasangil ang suspek nga gikuha didto sa iyang pinuy-anan ang giutang niyang motorsiklo nga wala siya pahibaw-a hinungdan nga nakigkita siya sa biktima.

Didto sila magtagbo sa J. Almerante St sa maong dakbayan   diin misangko sa panaglalis ug dihang miinit na pag-ayo, gipusil sa suspek ang biktima.

Nasabak ang biktima sa tiyan apan wala makalapos ang bala niini ug miungot pa karon sa ilawom sa tiyan.

Ang biktima daling gihatud sa Verallo District Hospital apan gi-transfer dayun kini sa tambalanan sa dakbayan sa Sugbo tungod kay operahanan.

Samtang ang suspek nasikop dayon sa mga nirespondi nga polis ug nakuha gikan kaniya ang kalibre 38 nga armas nga duna pay lima ka buhing bala ug usa ka kabhang sulod sa cylinder niini ug maoy gituohang gigamit sa krimin.

Ang suspek kasamtangang nagtingkagol sa karsel samtang nagpaabot sa tukmang sumbong nga ipasaka batok niya. (WC) (BANATNEWS)