Merkado sa karne palapdan

CEBU, Philippines - Bugtong paagi aron molambo ang sektor sa namuhi og baboy nga nagsuplay og karne sa kamerkaduhan sa Central Visayas mao ang pagpalapad sa ilang merkado.

Kini maoy gibutyag ni AGHAM Partylist Rep. Angelo Palmones atol sa pakigtagbo niini sa mga sakop sa Central Visayas Pork Producers Cooperative sa nakalabay’ng semana atol sa ilang labing unang anibersaryo.

Si Palmones nagkanayon nga aron makab-ot kini kinahanglang makatukod og kaugalingong mga slaughterhouses ang kooperatiba aron sa ingon makaapas sila sa panginahanglan sa karne dili lang sa Kabisay-an lakip na unya sa Luzon ug Mindanao.

Sa pagkakaron ang mga namuhi og baboy anha magpaihaw sa mga pribadong ihawan ug mga ihawang iya sa mga nagkadaiyang siyudad.

Kun aduna na unya silay kaugalingong ihawan ug ma-accredit ngadto sa “AAA” standard mamahimo na silang maka-compete sa mga imported nga karneng gipasulod dinhi sa nasud.

Gawas pa niana mas modako ang ilang ginansya sanglit mamenusan na sila sa gastos tungod kay makadirekta sila pag-ihaw ug paghatud ngadto sa kamerkaduhan.

Pinaagi usab sa maong mga ihawan mohinay ang demand sa imported meat nga mao karoy gisaligang pangpuno sa kakuwangon sa suplay sa karne sa kamerkaduhan ug sa mga food processing industry sa nasud.

Hinuon si Roland Tambago, ang pangulo sa maong kooperatiba nagkanayon nga mao ni karon ang ilang gipaningkamutang mahitabo ug ilaha na kining gisugdan pinaagi sa pagpalapad pa sa ilang ginsakupan.

Sa pagkakaron ang maong kooperatiba naglangkob sa 35 porsiyento sa nagsuplay og karne sa kamerkaduhan sa Kabisay-an ug ang uban pulos na mga backyard hog raisers nga buot nilang mahisakop sa ilang pundok. (BANAT NEWS)