Pagbukas sa access road hapsay

CEBU, Philippines - Gihulagway sa kagamhanan sa lalawigan sa Sugbo nga hapsay ang hingpit nga pagbukas sa Capitol Compound Access Road alang sa mga motorista ilabi na sa mga PUJ nga mopaingon sa Guadalupe ug Banawa agi og pagluagluag sa trapiko sa dalan M. Velez diin gipahigayon  ang trabaho sa   drainage project sa Department of Public Works and Highways (DPWH) sa maong lugar.

Suma pa ni Capitol Consultant on Peace and Order and Security, Ret. Col. Cesar Veloso nga sukad niadtong adlaw nga Lunes wala silay nakitang problema sa pagbukas sa Kapitolyo sa nahisgutang access road.

Ang nahisgotang access road mao ang karsada nga magtadlas gikan sa maingate habig sa buhatan sa Department of Education (DepEd) Cebu Division office ngadto sa gate sa M. Velez street.

Matud pa ni Veloso nga ang hingpit nga kooperasyon sa kagamhanan sa dakbayan sa Sugbo dako kaayo og gikatabang niining tanan.

Sayo niini ang Kapitolyo ug ang Cebu City Traffic Operations and Management (CITOM) nagpinirmahay og memorandum of agreement nga magtinabangay sila sa pagatiman sa suliran sa trapiko sa maong lugar pinaagi sa pag-abli sa usa ka access road.

Sigon pa ni Veloso nga dako kaayo og natabang sa pagluag sa trapiko atubangan sa Kapitolyo ang pagbukas sa maong   access road.

Daghan sa mga   motorista ug mga pasahero ang nagpasalamat sa kagamhanan sa probinsiya sa pagbukas sa maong dalan kay dili na kaayo dugay ang ilang pagkatanggong sa trapiko sa nahisgutang lugar.

Gitumbok ni Veloso nga gawas sa mga CITOM personnel, ang mga blue guard sa Kapitolyo mitabang usab sa pag-atiman sa mga sakyanang moagi sa maong dapit aron magpabilin ang kahapsay ug kalinaw sa maong lugar.

Hinuon ang pagbukas sa maong access   road gituogan hangtod lamang sa Disyembre 15, nga maoy adlaw nga mahuman na ang drainage project sa DPWH.  - BANAT NEWS