Radaza uyon lamppost laroton

CEBU, Philippines - Si Lapulapu City Mayor Paz Radaza dakong uyon nga ipaibot ang mga lamppost nga anaa sa dakbayan sa Lapulapu nga gipanarok sukad pa sa pagpahigayon sa Asian Summit dinhi sa Sugbo niadtong 2006.

Matud pa ni Mayor Radaza nga dili niya dawaton ang pagdumala sa maong mga lamppost kun kini i-turn over kanila sa DPWH aron kini mamintinar.

Nasuta ni Radaza nga bati kaayo sa panan-aw sa mga dumuduong ang maong mga lamppost   nga baratohon kaayo og dagway apan mikantidad kuno og tag P250 mil ang matag usa unya wala nay gamit ug wala na mosiga gumikan kay gipasagdan nalang kini sa DPWH murag basura.

Sakit kaayo sa mata ug wala nay gamit ang maong mga lamppost nga ang uban nangabali na, may nagbahirig sa kadalanan hinungdan nga angayan na kining   panglaroton, sumala ni Radaza.

Apan matud pa sa mayor sa Lapulapu nga dili mangunay og puril niini ang kagamhanan sa dakbayan sa Lapulapu kay makigsabot pa sila sa DPWH ning maong isyu.

Nasagmuyo si Radaza sa maong mga lamppost gumikan kay gilambigit niini si Congressman Arturo “Boy” Radaza sa kasong pagpaburot sa kantidad niini human kini kuwestiyona sa ubang sektor gumikan sa kamahal sa presyo niini. - BANAT NEWS