Drayber sa traysikol sa talisay mitiyabaw

CEBU, Philippines -   Mga drayber sa traysikol sa dakbayan sa Talisay mitiyabaw na tungod sa kagamay sa ilang kinitaan human pasirad-i ang karaang parkingan nila sa gipasirad-ang Tabunok Public Market.

Ang mga drayber mihangyo sa siyudad nga paablihan og balik ang maong parkingan tungod sa kamenus sa sumasakay kanila sa bag-ong terminal diha sa Lagtang Public Market nga gibalhinan sa merkado publiko sa dakbayan.

Sumala pa sa ilang reklamo giingong 10 ngadto 20 porsiyento lang sa matag adlaw nilang pasahero ang mangomprahay sa merkado samtang ang uban pulos mga estudyante ug mga trabahante nga anha sa Tabunok manganaog aron manakay og pasaheroan padulong sa dakbayan sa Sugbu.

Ang konseho uban sa mga department heads nagtigom kalabot sa maong awhag.

Si Arturo Bas, Public Information Officer (PIO) sa siyudad sa pakighinabi kagahapon sa Banat News mibutyag nga wala makatambong sa maong tigom tungod si Mayor Socrates Fernandez lakip na si Bise Mayor Alan Bucao kinsa chairman sa City of Talisay Traffic Operation Development Authority (CT-TODA) ug ang vice chairman nga si Tronando Lastimosa tungod kay pareho silang nag-leave.

Hinuon matud ni Bas nga karong Huwebes ang maong problema ipaubos kini sa pagtuon sa CT-TODA ug ang resulta ipresentar nila ngadto sa mayor.(EIM)(BANAT NEWS)