CEBU, Philippines - Duha ka mga lalaki ang napalgang patay sa dagat sa managlahing lugar sa siyudad sa Danao ug lungsod sa Boljoon niadtong Lunes.
Ang patay’ng lawas nga napalgan nahitabo sa sitio Pasil sa barangay Poblacion, Boljoon diin usa ka Albeno Ortiz Miguezo, 62, molupyo sa barangay San Antonio ang nakit-an patay diha sa dagat.
Matud ni SPO1 Fernando Toledo sa Boljoon Police Station dihang nahinabi sa Banat News nga adunay kakulian sa panglawas si Miguezo ug uwahi kining nakit-ang buhi nianang alas 5:00 sa buntag nga naligo sa dagat.
Samtang pagka alas 3:25 sa hapon usa ka mananagat ang nalumos sa barangay Dunggo-an siyudad sa Danao diin usa ka Jacinto Ginco Olager ang napalgang wala nay kinabuhi naglutaw sa dagat.
Matud ni PO1 Faron Abela sa Danao City Police Station dinhi sa Banat News usa ka mangingisda sa maong lugar ang nakadiskobri kang Olager diha sa lapyahan nga gibanlas sa bawod.
Nasuta nga niadto pang Domingo kini na-missing ug gipa-blotter na nila sa kapolisan human wala makauli gikan nanagat. (BANAT NEWS)