May timbangan sa Carbon tikasan

CEBU, Philippines - Daghang mga timbangan sa merkado sa Carbon ning dakbayan sa Sugbo ang kuwang gyud og timbang o sa laktod tikasan.

Mao kini nasuta sa usa ka grupo sa mga konsumedor kinsa hilom nga misuroy sa Carbon market kagahapon sa buntag aron pagsuta ang tinuoray nga kahimtang sa mga timbangan sa maong dapit.

Sila mao ang membro sa Consumers’ Right for Economic Welfare (CREW) kinsa mi-inspection sa mga timbangan sa mga lab-asira sa dapit sa isdaan , karnehan ug prutasan sa maong merkado.

Sa maong inspection , ilang nasuta nga may mga timbangan nga husto og timbang samtang daghan usab ang kuwang sa timbang.

Ang usa sa board of director sa maong grupo nga si Frohnie Cagalitan mipadayag nga ila kining gibuhat aron mahibaw-an sa mga negosyante nga nag-monitor kanunay   kanila ang mga konsumedor.

Gitataw hinuon ni Cagalitan nga wala sila’y katungod sa pagsikop niini, sanglit walay “police power” ang ilang grupo apan nagdasig kini sa mga negosyante nga magtinarong sa ilang paggamit sa timbangan sanglit adunay nagpaniid kanila nga mga konsumedor.

Wala hinuon niya matino ang gidaghanon sa mga stall sa Carbon Market ang ilang nasuroy sanglit igo ra nila nga gisuwayan pagsil-ing ang mga timbangan nga gigamit sa mga vendor.

Kung ang mga negosyante magtinarong sa ilang timbangan, seguradong mopilit   gyud kanila ang ilang mga suki apan kun tikasan ang ilang timbangan, walay mga customer nga mopalit sa ilang baligya.

Samtang usa ka Reline Cordero , usa sa mga mamalit sa Carbon Market ang nahinabi sa Banat News misaysay nga pilion gyud niya ang tindahan nga husto og   timbangan aron dili siya maalakanse sa iyang paliton ilabi na nga para usab niya baligya ang mga butang nga paliton niya sa maong merkado.

“Pasalamat sad ko nga dunay consumer group ang mibuhat ana, bisan ako mas adto gyud ko mopalit kung dunay sakto nga timbangan,” matud pa ni Cordero. (BANATNEWS)