Santos mi-plead not guilty

CEBU, Philippines - Mi-plead not guilty si Bella Ruby Santos atol sa gipahigayon nga arraignment kagahapong adlawa diha sa sala ni Regional Trial Court (RTC) Branch 6- Judge Ester Veloso. Si Santos nga nagsul-ob og lalag nga t-shirt ug puti nga karsones inubanan sa iyang mga abogado mibutyag nga wala siya’y sala sa nahitabong pagdagit patay sa 6-anyos nga batang si Ella Joy Pique.

Atol sa gihimong arraignment, napuno ang korte sa mga tawo apan ang amahan sa 6-anyos nga si Renante Pique diha lang sa suok nagtutok ngadto kang Santos samtang nagpadayun ang arraignment. Wala na hinuon makurat pa si Pique   sa tubag ni Santos ug misalig nga adto na kini daugon sa presentasyon sa tanang ebidensya.

Ang kampo ni Santos mipadayag nga wala na sila magkinahanglan pang mokomento sa ilang gisang-at nga motion to post bail ug ang marathon hearing. Matud pa ni Atty. Julius Caesar Entice nga ang pagpiyansa usa ka katungod sa akusado sama sa iyang kliyenteng si Santos apan kinahanglang tubagon sa prosekusyon ang mosyon tungod kay mao man usab ang balaod.

Ang prosecution gihatagan og napulo ka adlaw aron tubagon ang mosyon nga gisang-at sa depensa. Gihulagway hinuon kini ni Entice nga ‘delaying tactic’ sanglit taas ra kaayo ang napulo ka adlaw. Kahinumduman nga si Santos ug ang iyang hinigugmang si Ian Charles Griffiths gipasakaan og kasong kidnapping with homicide tungod sa nahitabong pagdagit patay ni Ellah Joy.

Si Sr. Supt. Patrocinio Comendador, ang tigpamaba sa Task Force Ellah Joy Pique nagkanayon nga ila nang gisalig ang kaso sa provincial prosecutors ug nagtuo silang makabarog ang kaso batok sa mga akusado.

Samtang ang task force ug ang Children’s Legal Bureau moabag nalang sa prosekusyon.

Si Ellah Joy na-missing niadtong Pebrero 8 ning tuiga diin nakit-an kini sa iyang kauban nga misakay sa usa ka sakyanan nga adunay Filipina ug foreigner.

Human sa nahitabong pagpanagit ni Ellah Joy nakit-an lang kini nga wala nay kinabuhi ug giputos na og habol nga gilabay sa bung-aw sa lungsod sa Barili. (BANATNEWS)