Garcia uyon sa bag-ong karsada

CEBU, Philippines - Bukas kaayo si Gobernor Gwendolyn Garcia sa plano sa dakbayan sa Sugbo sa paghimo og karsada gikan sa may NBI office padulong sa dalan V. Rama nga mobaktas sa yuta nga gipanag-iya sa lalawigan sa Sugbo.

Nakab-ot ang maong desisyon atol sa tigum sa gobernador uban ang mga opisyales sa Cebu City Traffic Operation Management (CITOM) didto sa buhatan sa gobernador.

Sa maong tigum gipadayag sa gobernador nga andam siya nga mohatag og counterpart nga pundo alang sa maong proyekto.

Matud niya nga kini maoy iyang tabang sa dakbayan sa Sugbo aron magmalamposon ang maong proyekto.

Subay sa maong pamahayag sa gobernador dili matukib ang kalipay nga gibati ni Cebu City Traffic operation management Chairman former Cebu City Councilor Sylvan “Jack” Jakosalem.

Sigun pa ni Jakosalem ang maong proyekto magkinahanglan nga magtukod og taytayan sa may M. Velez.

Iyang gitataw nga ang gobernadora misugot nga tungaon sa siyudad ug probinsiya ang gastohanan sa maong proyekto.

Dugang pa ni Jakosalem nga ang mao unyang taytayan maoy konkrektong simbolo sa panaghiusa ug maayong relasyon sa siyudad ug sa lalawigan sa Sugbo.  - BANAT NEWS