200,000 ka mga solar bulb ipagama

CEBU, Philippines - Ang kagamhanan sa lalawigan sa Sugbo misaad nga mogama og 200 mil ka mga solar bottle bulb agi og pagtuman sa tinguha ni Governor Gwendolyn Garcia nga makadaginot ang mga molupyo sa lalawigan sa bayranan sa kuryente pinaagi sa paggamit   sa nahisgutang matang sa suga.

Gipadayag sa program director sa Ramon Aboitiz Foundation Incorporated nga si Rowena Alinsonorin, kinsa usa sa mga kaabag sa gobernador sa pagpatuman sa maong proyekto, nga misaka ang gidaghanon sa himoong solar bottle bulb sa lalawigan human mopasalig ang Department of Education (DepEd) nga motabang sa pagpabrika sa nahisgutang matang sa bombelya.

Ang solar bottle bulb ginama sa usa ka litrong baseyo nga plastik sa   softdrink, nga himabawon sa sulod nga tubig nga sambogan og kemikal nga makapahayag niini kun maigo sa hayag sa adlaw.

Sigun pa ni Alinsonorin nga ang mga opisyal sa DepEd mipasalig nga ang mga kabataang nagtungha patabangon nila sa pagpangita og   mga baseyong plastik sa softdrink alang ning maong proyekto.

Ang makolektang mga baseyo sa DepEd, dad-on ngadto sa   Cebu Provincial Detention and Rehabilitation Center (CPDRC) sa barangay Kalunasan ning siyudad sa Sugbo aron adto didto pabrikaha sa mga binilanggong mananayaw.

Midugang si Alinsonorin nga matud pa hapit na usab maplansa ang ipahigayon nga run to light diin ang magsilbing registration fee mga empty plastic bottle alang ning maong proyekto.

Kun makolekta ug matigom na ang maong mga baseyo nga plastic sa softdrink ipadala dayon kini ngadto sa CPDRC diin tua ang  pabrika.

Ang maong mga solar bulb maoy ipang-apod-apod   sa kagamhanan sa lalawigan ngadto sa mga molupyo nga naglisod sa pagpataod og kuryente.  - BANAT NEWS