Access road sa Capitol ablihan

CEBU, Philippines - Ablihan na sugod karong adlawa ang access road nga nahimutang sa luyong bahin sa provincial Capitol building ug kilid sa legislative building.

Kini aron kahatagan og higayon nga makagamit ang pribadong sakyanan ug mga PUJ nga mopaingon sa M. Velez Street ug moluag ang trapiko sa dalan Don Gil Garcia Street nga nabara karon tungod sa padayon nga pag-ayo sa drainage system nga gipatuman sa Department of Public Works and Highways kon DPWH.

Ang maong pagbukas sa access road sa Capitol compound road gitugot ni Governor Gwendolyn Garcia agi og katumanan sa memorandum of agreement nga gipirmahan niya uban ni Cebu City Traffic Operations Management (CITOM) chairman Sylvan "Jack" Jakosalem ug Engr. Nicomedes Leonor Jr., ang district Engineer sa DPWH dinhi sa siyudad sa Sugbo.

Matud pa ni Garcia nga misanong siya sa maong kasabutan tungod usab sa hangyo ni Cebu City Mayor Mike Rama kinsa naningkamot nga moluag ang trapiko sa dapit sa Kapitolyo.

Apan giklaro sa gobernadora nga ang pagbukas sa maong access road sa Kapitolyo temporaryo lamang kay inigkahuman sa pag-ayo sa imbornal sa Don Gil Garcia Street dili na usab paagian og mga sakyanan ang Capitol compound.

Si Engr. Leonor mipasalig sa gobernador nga sa Disyembre 15, 2011 mahuman na ang maong proyekto ug mobalik na unya ang normal nga dagan sa trapiko sa maong dalan.  - BANAT NEWS