CEBU, Philippines - Giunay og pusil sa karibal nga konduktor ang laing konduktor og jeep pasaheroan nga gipasanginlang nangilog og trabaho sa suspek diha sa terminal sa Poblacion siyudad sa Danao kagahapon sa alas 11:40 sa buntag.
Ang biktima nga nakaangkon og lapos nga samad pinusilan mao si Michael Ortega Jaime, konduktor og jeep pasahero-an ug nagpuyo sa Jubay lungsod sa Liloan.
Samtang ang suspek mao si Felix Bellona Estomago, 41, taga Rizal St., Suba Danao City.
Matud ni PO1 Faron Abela, desk officer sa Danao City Police Station dihang nahinabi sa Banat News miingon nga ang biktima ug ang suspek naglalis diha sa terminal ug misangpot sa away.
Ang suspek mibunot sa giluklok nga armas ug gipusil ang biktima sa walang bahin sa lawas ug milapos sa pikas tuong bahin sa lawas.
Daling gihatud sa Danao City District Hospital ang biktima apan tungod kay talandugon ang kahimtang gilahos kini sa tambalanan dinhi sa dakbayan sa Sugbo.
Samtang ang suspek nga buot unta moeskapo ang naabtan ug nasikop sa mirespondeng mga polis ug nakuha gikan kaniya ang .357 nga armas nga dunay lima ka buhing bala ug usa ka kabhang sud sa cylinder niini.
Gawas niini nakuhaan pa gyud ang suspek og Batangas knife diha sa iyang kilid ug gibalhog sa karsel samtang gihikay ang kasong ipasaka batok niya.
Ang suspek mibutyag atol sa pagsukit sukit sa kapulisan nga nasuko siya sa biktima tungod kay siya unta ang schedule nga mokonduk niadtong tungura apan pag-anha niya sa terminal giilogan na siya sa biktima.
Dugang niya duna na usab silay karaang panagbingkil sa biktima may labot gihapon sa ilang trabaho nga pagpangundok og jeep pasaheroan. (BANATNEWS)