CEBU, Philippines - Napisat ang ulo sa usa ka 11 anyos nga batang lalaki human kini maligsi sa usa ka trailer truck didto sa dalan Monlight Inn sa barangay Tipolo, dakbayan sa Mandaue niadtong Biyernes sa hapon. Si PO3 Ruben Serdana sa traffic section sa kapolisan sa Mandaue City Police Office (MCPO) miila sa biktima nga si Andam Carl Canemenido, taga back Malibu, barangay Subangdaku, dakbayan sa Mandaue.
Samtang ang drayber sa trailer truck nga nakaligis sa biktima mao si Jolito Martos, 34, nga taga lungsod sa Madridejos sa isla sa Bantayan ug ang sakyanang gimaneho niya nga usa ka prime mover gipanag-iya sa ACE Trucking Corporation.
Nasayran gikan kang PO3 Serdana nga nagduwaduwa ang biktima kuyog sa iyang higala sa maong dapit dihang si Martos mipaatras sa iyang trailer truck. Matud pa ni PO3 Serdana nga ang biktima nga nalingaw sa iyang pagduwaduwa wala makamatikod sa pag-atras sa trailer paingon sa iyang nahimutangan.
Si PO3 Serdana miingon nga walay truck boy si Martos busa walay nakakita sa biktima nga giatrasan na kini sa sakyanan hangtod nga naigo ang bata sa pangulahiang ligid niini ug sa iyang pagkatumba nalatayan kini sa hingpit sa mga ligid sa trailer nga giguyod sa maong trak.
Ang suspetsadong drayber mitahan dayon ngadto sa buhatan sa kapolisan ug temporaryo kining gibalhog karon sa detention cell sa Presinto 2 sa Subangdaku Police Station. (BANATNEWS)