CEBU, Philippines - Tungod sa problema sa malnutrisyon ilabi na sa kabataan sa atong nasud gilusad ang Laki sa Gatas campaign sa usa ka kompanyang tiggama og gatas nga gisuportahan ni Miss Universe 4th Runner up Venus Raj kagahapon diha sa Lahug Elementary School ning dakbayan kagahapon.
Si Raj mipasabot kung unsa ka mahinungdanon ang sustansyadong pagkaon alang sa kabataan ug kung unsa kadako ang papel sa maayong panglawas sa kalamposan sa kabataan sa ilang mga pangandoy pinaagi sa edukasyon.
Si Raj kinsa nagagikan sa probinsya sa Camarines Sur miingon nga dili babag sa kakabus aron di mahatag ang pangandoy sa kabataan ug ang edukasyon maoy taytayan aron makab-ot kini. Sumala pa niya nga ang hustong edukasyon usa sa mga solusyon alang sa pagtubag sa malnutrisyon sa nasud.
Ang maong kampanya nga gipasiugdahan sa Nestle Philippines nagtudlo usab sa mga ginikanang ubos kaayo ang panalapi kung unsaon paghatag sa ilang mga anak sa saktong pagkaon ug gatas alang sa himsog nga panglawas. Giawhag sa maong kampanya ang mga ginikanan nga batasanon ang pagpainom og gatas sa ilang mga anak. - BANAT NEWS