CEBU, Philippines - Namatay sud sa tambalanan ang operator sa fork lift human kini aksidenteng napusilan sa ilang guwardiya nga nag-roving sulod sa pabrika sa tsinelas sa barangay Inayagan lungsod sa Minglanilla alas 2:00 niadtong Huwebes sa hapon apan pagka alas 3:00 pasado sa hapon na report sa kapulisan.
Ang biktima mao si Bryan Gabinete, 22, molupyo sa South Poblacion,Minglanilla samtang ang suspek mao si Allan Ray Alegado, 19, taga barangay Guadalupe siyudad sa Carcar nga guwardiya sa maong kompaniya nga konektado sa Centurion Security Agency.
Matud ni SPO1 Romeo Barde, imbestigador sa Minglanilla Police Station dihang nahinabi sa Banat News ang biktima nag-operate niadtong tungora sa fork lift samtang ang guwardiya nag-roving sa lugar niadtong tungora.
Apan kalit nga mibuto ang armas niini. Giingong mibuto kini dihang iyang gilimpyohan ug naigo sa kilid sa ulo ang biktima apan ang bala milapos sa sentro sa iyang agtang hinungdan sa pagkahagba niini.
Daling gihatud sa South General Hospital ang biktima apan paglabay sa pipila ka mga oras namatay kini samtang gitabang sa mga doktor.
Samtang ang guwardiya nadakpan dayun sa mirespondeng mga polis ug nagtingkagol na karun sa karsel ug nakuha gikan sa iyang posesyon ang service nga kalibre .38 nga dunay tulo ka buhing bala ug usa ka kabhang sud sa tambor niini.Ang kapulisan mihikay na sa kasong ipasaka batok sa suspek. - BANAT NEWS