CEBU, Philippines - Giplano karon sa kagamhanan sa dakbayan sa Mandaue ang pagpatukod sa Children’s Center nga maoy mahimong kapuy-an sa mga street children sa dakbayan sa umaabot nga mga adlaw.
Si Violita Cabada nga maoy City Social Welfare and Services (CSWS) officer sa maong dakbayan mipadayag nga kabahin kini sa programa alang sa kabataan sa dakbayan.
Niadtong miaging adlaw gipasidunggan sa dakbayan ang 20 ka mga “Outstanding Children” isip pag-ila sa ilang maayong academic performance ug ingon man usab sa ilang pagserbisyo sa komunidad.
Si Mrs. Sarah Cortes nga maoy chairperson sa Mandaue City Council for the Protection of Children maoy nangulo paghatag og pasidungog nga gitambongan usab ni Bise Mayor Glenn Bercede, Maricel Yu nga maoy focal person sa kagamhanan. Naglakip sa kabataan nga gipasidunggan niadtong miaging adlaw mao sila si John Keith S. Mazo, 16 anyos nga tinun-an sa fourth year sa St. Louis College-Cebu.
Kinsa gawas nga maayo ang iyang gipakitang performance sa academic, aktibo usab kini sa mga kalihokan sa komunidad isip presidente sa school’s supreme student government, presidente sa Rotary Club, CAT battalion commander, orator ug debator.
Aktibo usab kini sa relihiyosong kalihokan sa simbahan isip lector sa panahon sa misa ug ingon man sa musika pinaagi sa pagpatogtog sa piano, violin ug uban pa.
Dugang nga mga gipasidunggan mao sila si Sheila Mahusay sa Mandaue City Comprehensive National High School, Angelica Conde sa Labogon National High School, Danie Mae Ybañez sa Mandaue City Science High School, Ma. Liza Zarate sa Mandaue City Comprehensive National High School ug uban pa. (BANATNEWS)