Gipusil patay atubangan sa kapuyo

CEBU, Philippines - Namatay diha-diha ang usa ka piyado sa plantasyon sa saging human kini pusila samtang nanihapon sa wala hiilhing kriminal  sulod sa iyang payag sa barangay Langtad lungsod sa Argao niadtong Martes sa alas 8:15 sa gabii.

Ang biktima mao si Wilfredo Pardo, 49, ulitawong may kapuyo ug nagpuyo sa maong lugar apan lumad nga taga lungsod sa Alcantara.

Si PO2 Benjamen Gerozaga, desk officer sa Argao Police Station mibutyag sa Banat News nga ang biktima ug ang kapuyo mao pay paglingkod sa ilang kan-anan kay manihapon   dihang kalit lang gipusil sa kriminal nga nagsil-ing kanila sa bongbong sa ilang payag.

Nasabak ang dughan sa biktima sa usa ka bala nga milapos sa bukobuko sa biktima kinsa dihadiha nahagba dayon atubangan sa ilang pagkaon.

Ang kapuyo sa biktima nga diha sa hilabihang kakuyaw maoy nanangpit dayon sa iyang mga silingan og panabang samtang ang kriminal yano ra kaayong nakapahilayo gikan sa maong lugar nga walay nakaila gumikan sa kangitngit sa palibot.

Wala na madalang buhi sa kapolisan ngadto sa tambalanan ang biktima   tungod kay nakabsan dayon kini sa kinabuhi.

Sa sayo pa nasayran sa kapolisan nga nagpa-blotter na ang biktima sa miaging buwan human siya pusila sa wala hiilhing kriminal apan wala siya maigo.

Padayon pang gipangita sa kapolisan ang kriminal samtang gisuta usab kun unsay atraso sa biktima. - Darrel A. Carumba/WC (BANATNEWS)