Motor naguroy sa bus usa patay

CEBU, Philippines - Maayong pagkaguroy sa usa ka motorsiklo nga adunay sakay nga duha ka tawo sa nakadumbol nga pasaheroang bus pasado alas-2 sa hapon kagahapon sa dalan sa barangay Luray 2 syudad sa Toledo.

Ang namatay nailhan nga si Roberto Obenza, 58, molupyo sa barangay Das Lutupan sa nahisgutang syudad samtang samaran usab si Dolorosa Maasin, 45, molupyo sa Cantigae, Media Onse sa nahisgutang syudad.

Ang nakadasmag kanila mao ang usa ka Corominas Bus nga gimaneho ni Armando Ondoy, taga Tuburan nga gikan sa dakbayan sa Sugbu.

Sa pakighinabi sa Banat News ni PO2 Cris Gako, Toledo City Traffic Investigator mibutyag nga si Obenza nagmaneho sa iyang motorsiklo nga Honda XRM ug angkas niini si Dolorosa.

Matud pa ni Gako, nga si Obenza gikan sa barangay Media Onse ug gisundan sa maong bus ug pag-abot sa nahitaboan misuway og overtake si Ondoy ni Obenza apan iyaha kining naigo.

Ang motorsiklo midiretso og katumba ug naguroy sa maong bus diha sa sementadong karsada. Ang mga sakay sa motorsiklo nga nangatagak daling gitabang sa mga tawo ug gidala sa tambalanan.

Si Obenza gidala sa Toledo District Hospital apan gideklarar kini nga dead on arrival samtang si Maasin padayong giatiman sa mga doktor.

Boluntaryo hinuong mitahan sa iyang kaugalingon sa kapolisan si Ondoy ug gikatakdang pasakaan og kasong reckless imprudence resulting to homicide and physical injuries.

Matud pa ni Gako nga base sa nakuha nilang impormasyon daw nag-overspeeding si Ondoy ug kini makita diha palang sa skid mark sa brake. (EIM) (BANAT)