CEBU, Philippines - Pito ka mga mananagat ang gidakop ug gibilanggo sa lungsod sa Cordova human kini masakping ilegal nga nangisda sa isla sa Hilotongan niadtong Martes sa alas 9:45 sa gabii.
Ang mga nadakpan mao sila si Leonor Wamar, 39, Jesus Estora, 20, Garbo Navaja, 30, Frankie Maravilles, 29, Joselito Mamalia, 34, Satur Zapra, 35, ug Ronbie Cornelio, 40, pulos mga taga lungsod sa San Fernando.
Matud ni SPO1 Danny Alburo sa Cordova Police Station dihang nahinabi sa Banat News ang maong mga mananagat nakalapas sa ordinansa sa lungsod sa aktong nangisda sulod sa teritoryo sa lungsod.
Ang grupo migamit og pukot niadtong tungura sakay sa usa ka dakung pumpboat ug gidala na kini karon sa buhatan sa kapulisan. Gipaabot nga pamultahon ang pito sa ilang kalapasan.(Darrel A. Carumba/EIM) (BANAT)