Pag-suplay og karne sa luzon gitun-an

CEBU, Philippines - Maglisod pa ang mga lokal nga tigpamuhi og baboy dinhi sa Central Visayas aron maka-suplay og daghang karne sa baboy ngadto sa kaulohan gumikan sa kakulang sa pasilidad nga makadawat sa gidaghanon sa ihawon.

Si Roland Tambago, ang presidente sa Central Visayas Pork Production Cooperative (CViPPCO) nga bisan og gustohon nilang makasuplay og karne ngadto sa Luzon dili nila kini mahimo gumikan sa kakulang sa pasilidad dinhi.

Sukwahi kaniadto nga buhi nga baboy ang dad-on pagbiyahe sakay sa mga barko, karne na karon ang gipangita didto sa Luzon. Kini tungod sa kadako sa alkanse sa mga suppliers dinhi sa pagbiyahe sa mga buhing baboy.

Usa sa mga makaalkanse kanila mao ang pagkamatay sa mga baboy samtang gibiyahe ug ang pag-usab usab sa panahon maong mas dako ang mawala kanila kumparar sa ginansyahon tungod kay parehas ra ang presyo dinhi ug didto sa baboy.

Sumala pa ni Tambago nga sa pagkakaron ginagmay palang gyud ang mapadalang carcass kon inihaw nang daan nga baboy didto sa Luzon gikan dinhi gumikan kay dili pa maapupa sa mga ihawan dinhi sa Central Visayas ang pag-ihaw og dinaghan gawas lang sa panginahanglan sa lokal nga merkado dinhi.

Matud pang Tambago ang pagpadala sa ilang grupo og mga ‘carcass’ (tibuok karne) didto kasamtangan pang gitun-an kun makatubag ba sa gipangita sa mga pork suppliers sa Kabisay-an.

Ang CViPPCO nag-suplay og 55 toneladang karneng baboy matag adlaw sa kamerkadohan sa Sugbu.

Kagahapong adlawa ang CViPPCO nagselebrar sa ilang labing unang anibersaryo sukad nga sila naghugpong sa milabay’ng tuig ug ilang pinasidunggang dinapit si Kong. Angelo Palmones.(EIM) (BANAT)